Að sitja í kyrrðum

Eldgos eru hvergi nefnd í Íslendingasögum. Það kann að vekja furðu en í raun þótti óþarft að segja frá því algenga og auðsæja. M.ö.o. það tók því ekki að nefna það.

Ekki er heldur mikil kyrrð í fornsögum. Kyrrð er þar sjaldan nefnd. Þó greinir frá því í Finnboga sögu ramma og Gunnars sögu Kveldnúpsfífls að menn "sátu í kyrrðum" og þá gjarnan skömmu fyrir einhvern ófrið. En aldrei lengi.

Nema í Kormáks sögu.
Þar lætur Bersi gera virki um bæ sinn og "sat þá marga vetur í kyrrðum". Þetta þótti saga til næsta bæjar. Bersi var auðmaður, vígamaður og hólmgöngumaður en um leið drengur góður. Eftir ófarir sínar var hann uppnefndur af sætustu stelpunni í sögunni: "Rassa-Bersi", nafn sem ekki hæfir sönnum víkingi og alls ekki manni, sem áður var nefndur "Hólmgöngu-Bersi". Nú sitja auðugir víkingar ekki í kyrrðum, ótilneiddir. En það er ljótt að uppnefna fólk.

Kyrrð færist nú yfir Eyjafjallajökul. Þá ættu menn að vera á varðbergi, því eldur kraumar undir. Ómar Ragnarsson, sem hefur fylgst með 21 eldgosi segir að þegar kyrrðin færist yfir, þá fyrst sé vá fyrir dyrum. Kvikan getur brotist upp á óvæntum stað.

En það tekur því varla að nefna það.  

"Torugætir eru, teitan
tók hrafn á ná jafnan,
ek em við ógnar rekka
óhryggr, vinir tryggvir."
      Hólmgöngu-Bersi (uppnefndur Rassa-Bersi)

Keep it simple
BB King

 

 

 

 

Athugasemdir

[Guðrún Sæmundsdóttir, 21.5.2010 kl. 10:28]

Hver man ekki þá tíma sem að stjórnmálamenn höfðu það eitt við sinn tíma að gera að skipta sér af því hvort að börn væru klædd í bleikan eða bláan fatnaðað á spítulum! Og erlendu fréttirnar færðu okkur skilmerkilegar fréttir af París Hilton. Hvað er nú annars að frétta af henni stúlkukindinni?

[Júlíus Valsson, 21.5.2010 kl. 10:30]

Rétt hjá þér Guðrún. Það ætti ekki vera nein gúrkutíð.

[Tómas H Sveinsson, 21.5.2010 kl. 17:21]

Varðandi eldgosin og söuna, minni ég á "Hverju reiddust goðin er það hraun rann er vér nú stöndum á". Þetta svar, árið 1000, á Alþingi, var sagt vegna fréttar um eldgos.

[Júlíus Valsson, 21.5.2010 kl. 17:58]

Góð tilraun Tómas. En...
Biskupasögur eru ekki taldar til Íslendingasagna og hraun er ekki það sama og eldgos (sbr. Falukorv er ekki það sama og sænskur grís).

Munið broskarlana :)

[Tómas H Sveinsson, 21.5.2010 kl. 18:17]

Jú, en þó ekki. Maður kom ríðandi að austan og sagði að eldgos væri hafið. Þá sagði einhver að það væri von því goðin hlytu að vera reið yfir þessum umræðum að asnast nú að fara að taka kristni. Þá sagði einhver spekingurinn "Hverju reiddust ....etc" Ergo. Eldgos er nefnt, en í hvaða sögu hef ég ekki hugmynd um. gæti þess vegna verið í sögunnunni um liitlu gulu hænuna

[Júlíus Valsson, 22.5.2010 kl. 02:03]

Sæll aftur Tommi

Þú meinar að Snorri goði hafi þá bara etið Goða pyslur?

[Júlíus Valsson, 22.5.2010 kl. 02:08]

Clintan forseti heimsótti áðurnefnt hraun og í beinu framhaldi af því fékk hann sér eina á Bæjarins bestu (þ.e. SS-pylsu) og nokkrum dögum síðar fékk hann kransæðastíflu. Það er kraftur í þessu