Lagerinn - Að vinna á lager

 

Nú eru þeir víst farnir að brugga fyrir norðan. Sum störf í þjóðfélaginu eru vanmetin. Gæði vinnunnar verða ekki metin af kaupinu eingöngu. Huga verður að fleiri atriðum. Best er að vinna í góðri prentsmiðju. Næst best er að vinna á lager. Góður lager er góður lager. Maður hlakkar til að mæta þar til vinnu að morgni. Fá sér kaffi, spjalla saman. Gera grín. Hefjast handa, svara í símann og taka til pantanir. Fylla út pappíra. Keyra út vörur, sækja vörur. Meiri pappír, fleiri vörur. Meiri vinna. Taka upp vörur, opna pakka, pakka inn, loka pökkum. Senda pakka. Fara í fyrirtæki og stofnanir. Spjalla við viðskiptavini. Svara í síma. Raða vörum í hillur. Telja vörur. Spjalla saman. Hlusta á tónlist, hlusta á fréttir. Kaffi, matur, meira kaffi. Horfa á hillur, horfa á pakka. Horfa á stelpur. Hugsa. Þetta getur tekið allan daginn. Svo er dagurinn búinn og menn halda heim. Sumir með trega. Hvað skilja menn eftir? Tóman lager? Betri lager?

"Keep it simple"
B.B.King

Athugasemdir

[Ósk Sigurðardóttir, 9.5.2007 kl. 07:44]

Heyrðu, já...gæti verið ágætis jobb - lagervinna ;)

Flott mynd af þér

[Ellert Júlíusson, 9.5.2007 kl. 10:39]

Góð lýsing á þessu starfi. Vantar reyndar aðalatriðið þarna......að aka lyftara.

[Júlíus Valsson, 9.5.2007 kl. 10:43]

Þetta er alveg rétt hjá þér Don. Ég reyndi hins vegar að halda græjunum í lágmarki í lýsingunni, ég á það nefnilega til að festast í þeim!

[Benedikt Halldórsson, 9.5.2007 kl. 21:35]

Æ, ég veit ekki, sjálfu vann ég eriðsvinnu í mörg ár og mér varð hugsað til hnjánna minna þegar ég las pistilinn þinn, hins vegar voru kaffitímarnir svo skemmtilegir og mannbætandi að hver sem einu sinni hefur drukkið kaffi og spjallað um heima og geima verður alheill á sál...og hnén fá kærkomna hvíld.

[Kristján Eldjárn Þorgeirsson, 10.5.2007 kl. 00:00]

Já það er örugglega þræl gaman að vinna á lager.  Það er hægt að kynnast fullt af fólki, bæði skemmtilegu og leiðinlegu.  Maður þarf að hafa samskipti við svo marga, sölumenn hja heildsölum, flutningabílstjóra og svo samstarfsmennina.

Kveðja góð!

Kristján Eldjárn.

P.S. Af hverju ertu með mynd af Villingaholti í Flóahreppi efst á síðunni þinni? Spyr bara af forvitni.

[Júlíus Valsson, 10.5.2007 kl. 11:18]

Sæll frændi!

Ég heillaðist af þessu bæjarstæði og umhverfi þess einn vordag, er ég stóð á tröppunum á Þjórsárveri eftir að hafa notið frábærrar gestrisni kvenfélagsins. Vanalega tek ég ljósmyndir af fólki svo þetta er ein af mínum fáu "landslagsmyndum". 
Það minnir mig á það að ég þarf að heimsækja hana Siggu á Grund! Hún er frábær listamaður og býr þarna rétt hjá.

[Guðmundur Pálsson, 10.5.2007 kl. 18:47]

Þetta er rétt hjá þér kollegi. Og þegar vel tekst til er vinnan okkar svona; yndislegt hversdagslegt erfiði sem þó er ekki neitt, neitt þó pakkarnir séu auðvitað misþungir. Kaffipásur og sögur. Ágætt, fínt. 

[Vilhelmina af Ugglas, 13.5.2007 kl. 13:45]

Fynnist þér sem frelsarinn

 

föstudaginn langa,

 

lýttu þá inná lagerinn

 

ljúft er þar að hanga.

[Anna Theodóra Rögnvaldsdóttir, 24.5.2007 kl. 20:34]

Var að ramba inn á þessa ágætu síðu rétt í þessu. Nú vill svo til að ég þekkti eitt sinn Júlíus nokkurn sem bjó í Vonarstræti 12 (myndi nú samt ekki lýsa þeim pilti sem götustráki). Við vorum saman í 7 & 8 ára bekk hjá Hólku gömlu í Miðbæjarbarnaskólanum. Ekki er þetta sami maðurinn?

[Júlíus Valsson, 24.5.2007 kl. 20:39]

jú (hvísl)