"Keep it simple" (B.B. King)

1.11.2008

Rafræn rök bítils

Fáir tónlistarmenn hafa notið eins mikillar velgegni og virðingar og gamli bítillinn Paul McCartney. Fáir hafa valdið eins miklum vonbrigðum. Wingsævintýri hans flugu bókstaflega út um gluggann. Hann er nú aftur mættur á svæðið eftir langt hlé. Það er greinilegt að kvennamálin hafa ekki alveg gert út af við sköpunargáfuna hjá karlinum, þótt Sæmundi gamla hafi þar verið slengt hættulega langt fram á rúmstokkinn.

Nýja platan hans nefnist "Electric Arguments" og er hún gefin út af hljómsveit hans The Fireman. Platan kemur væntanlega út þ. 17. nóvember n.k. (þ. 25. nóvember í USA). Mér skilst að þetta sé 3. plata hljómsveitarinnar. Hún er að sjálfsögðu tekin upp í Abbey Road hljóðverinu. Hvert lag var að sögn samið og tekið upp á einum og sama degi. það er stundum eins og Jeff Lynn hafi kíkt smávegis inn í hljóðverið.

Paul kemur mjög skemmtilega á óvart á þessari plötu. Hann er þarna í samvinnu með bassaleikara hljómsveitarinnar The Killing Joke, Martin "Youth" Glover. Á plötunni eru 13. mjög ólík lög en þau falla þó öll vel inn í heildarmyndina. Mörg lögin eru með grípandi laglínum, sem minnir á gömlu góðu dagana (Universal Here, Everlasting Now).
Einnig bregður fyrir þjóðlagaáhrifum, danstakti og jafnvel hörðu rokki ("Nothing Too Much Just Out of Sight"), sem slúðurblöðin í U.K. segja að sé sneið til fyrrverandi eiginkonu bítilsins, Heather Mills. Sum lögin á plötunni minna um margt á Hvíta albúm Bítlanna. Þetta er þó engin Bítlaplata og alls ekki nein Wingsplata. Hvert lag fer sína eigin leiðir og kveikir nýja elda. Lögin kafna ekki í moðreik þar er jafnvel að finna blús og gospel.

Electric Arguments sýnir að Paul er alls ekki af baki dottinn. Hann getur enn komið okkur á óvart og hann getur aðlagað sig að nýjum tímum. Það er ánægjulegt að heyra, hve einföld hugmynd getur leitt til heillar tónsmíðar og það er engu líkara en að menn séu að djamma í hljóðverinu og leika sér eins og á Abbey Road plötunni. Menningarvitar kalla þessa plötu "póstmóderníska Bítlaplötu". Akkúrat. Hún er á köflum dálítið dularfull, sérstaklega um miðbikið en lögunum er haldið saman í rafrænu, rökrænu samhengi með smá Bítlalími. Sum lögin gætu verið úr nýjustu Harry Pottermyndinni en önnur úr James Bond. Platan leynir á sér og það þarf að hlusta á hana aftur og aftur.
Mæli eindregið með þessari nýju plötu Pauls. Hún á eftir að heyrast víða. Þetta er besta plata hans síðan hann gerði sína fyrstu sólóplötu sem hét einfaldlega "Paul McCartney". Sá gamli kann enn að rokka.

Lagalisti:

1. Nothing Too Much Just Out Of Sight
2. Two Magpies
3. Sing The Changes
4. Traveling Light
5. Highway
6. Light From Your Lighthouse
7. Sun Is Shining
8. Dance ‘Til We’re High
9. Lifelong Passion
10. Is This Love?
11. Lovers In A Dream
12. Universal Here, Everlasting Now
13. Don't Stop Running