Um moldvörpur í ráðuneytinu

Moldvörpur eru víða óvinsælar skepnur. Þær sjást ekki en skilja eftir sig skýr ummerki á yfirborðinu með því að grafa göng undir jarðveginn og mynda moldarhrúgur. Þær starfa neðanjarðar og erfitt er að halda þeim í skefjum og moldarhrúgurnar halda áfram að vaxa öllum til ama.

Það virðist skipta litlu máli hvaða stjórnmálaflokkur á Íslandi sér um málefni orkumála. Niðurstaðan er sú sama: moldvörpurnar í ráðuneytinu vinna hörðum höndum að því að færa stjórn orkumála og orkumarkaðinn í landinu alfarið undir skrifstofuveldið í Brussel, þar sem áhersla er á einkavæðingu orkumarkaðarins, markaðssetningu raforkunnar með uppboðsmarkaði, sölu Landsvirkjunar, ásamt því að drita niður vindmyllum og smávirkjunum víðs vegar um landið.

Allt þetta er leitt af ESB og erlendum stórfyrirtækjum, oft undir formerkjum „loftslagsmála og orkuskipta“ eða jafnvel „hamfarahlýnunar“. Með mikilli leynd er nú unnið að undirbúningi 4. orkupakka ESB og í beinu framhaldi af honum lagningu sæstrengs til Bretlands, sem mun hafa í för með sér mikla hækkun á raforkuverði hér á landi eins og þekkist frá frændþjóðunum í Noregi og Svíþjóð.

Nú hefur ráðherra orkumála, aðalmoldvarpan, fullyrt hróðugur í fjölmiðlum að honum hafi tekist að fá samþykkt frumvarp á Alþingi sem „tryggir forgangsraforku til heimilanna á viðráðanlegu verði á tímum orkuskorts“. Þeir sem þekkja til orkupakka ESB vita að þessi „gjöf“ til íslensku þjóðarinnar er ekki merki um gjafmildi og góðmennsku ráðherrans eða embættismannanna í ráðuneytinu, heldur staðfestir hann hér nær orðréttan texta úr 1., 2. og 3. orkupakkanum, sem í raun hefði getað verið innleiddur fyrir löngu.

Gallinn er hins vegar sá, að hér er einungis tryggð forgangsorka til heimila á Íslandi við hörmulegar aðstæður og hamfarir, svo sem eldgos, jarðskjálfta eða stríð, þ.e. þegar nauðsynlegt er að skammta raforku vegna slíkra eða enn verri aðstæðna. Hvað ráðherrann og embættismennirnir meina með „viðráðanlegu verði“ er hins vegar algjörlega óljóst. Þeir þurfa líklega að leita skýringa á því hjá ESB. En hversu oft hefur í raun þurft að skammta raforku á Íslandi vegna náttúruhamfara eða stríðsátaka?

Þetta frumvarp orkumálaráðherrans er því algjörlega gagnslaust fyrir almenning og smærri fyrirtæki!

Þau þurfa áfram að keppa við stórnotendur á raforkumarkaði, nema þegar landið stendur frammi fyrir alvarlegum náttúruhamförum eða stríðsátökum.

Ráðherranum (yfirmoldvörpunni) dettur ekki í hug að setja þak á raforkuverð til heimila eða arðsemisþak á raforkusölu/dreifingu til heimila og smærri fyrirtækja í landinu. Það samræmist ekki reglum ESB og ljóst er að Íslendingar geta ekki lengur sett eigin orkulög án afskipta ESB, sem er bæði áhyggjuefni og afar niðurlægjandi.

Ísland er að þróast í að verða áhrifalaust jaðarríki sem framleiðir orku og hráefni fyrir Brussel. Ekki að undra þó ráðherranum og öðrum ESB-sinnum liggi á að innleiða Bókun 35, sem gerir allar þessar aðgerðir ESB mun auðveldari þar sem reglur og lög ESB gilda þá alfarið í stað íslenskra og Alþingi Íslendinga þvælist þá ekki lengur fyrir.

Líkt og alvöru moldvarpa grefur ráðherrann hægt og bítandi undan traustum, skilvirkum og ódýrum raforkumarkaði fyrir heimilin og smærri fyrirtæki á Íslandi og skilur eftir moldarhrúgur og ringulreið sem þjóðin áttar sig á of seint, þ.e. ekki fyrr en henni berst orkureikningurinn.

Íslandi er stjórnað af moldvörpum. 

 

Ref.

https://eur-lex.europa.eu/eli/dir/2009/72/oj/eng

#ESB #Bókun 35 #fullveldi Íslands #frelsi #EES-samningur #sjálfstæði #lýðræði #Ísland #stjórnarskrá #stjórnarskrárbrot #orkupakki #orkupakkar #þriðju orkupakkinn #raforka #raforkumarkaður  Top of Form

Heilbrigðisreglugerð WHO: Hagsmunir eða heimska?

Ísland stendur nú frammi fyrir ákvörðun, sem kann að virðast tæknileg og fjarlæg, en sem snertir eitt af helgustu gildi íslenskrar stjórnskipunar: 
Fullveldi þjóðarinnar.

Hér er átt við fyrirhugaðar breytingar á Alþjóðlegu heilbrigðisreglugerðinni (IHR) og nýjan heimsfaraldurssamning sem Alþjóðaheilbrigðismálastofnunin (WHO) vinnur að. Breytingarnar taka sjálfkrafa gildi hjá aðildarríkjum 19. júlí næstkomandi, nema þeim sé hafnað með formlegri yfirlýsingu.

Ísland er meðal aðildarríkjanna en stjórnvöld hafa ekki tjáð sig opinberlega um málið.

Hvers vegna veit nú enginn. Eru það hagsmunir eða heimska?
RÚV fjallar ekki málið. Kemur það á óvart?

Ógn við fullveldi Íslands

Í stjórnarskrá Íslands segir skýrt í 1. grein að Ísland sé fullvalda ríki. Öll valdheimild stjórnvalda á upptök sín hjá íslensku þjóðinni, engum öðrum. Nú er hins vegar gert ráð fyrir að WHO geti í framtíðinni tekið sér vald til að lýsa yfir alþjóðlegum neyðarástandi og leggja fyrir einstök aðildarríki að framkvæma tilteknar ráðstafanir.

Við Íslendingar verðum að spyrja okkur: Erum við reiðubúin að framselja vald yfir eigin sóttvarnaráætlunum til aðila alþjóðastofnunar sem enginn Íslendingur hefur kosið?

Enn eitt framsalið á fullveldi Íslands? Enn eitt stjórnarskrárbrotið?

Mannréttindi og lýðræði í húfi

Hér er ekki bara spurning um fullveldi ríkisins, heldur einnig um grundvallarréttindi borgaranna. Breytingarnar á IHR og nýi samningurinn gætu opnað dyrnar að eftirfarandi ráðstöfunum:

1. Ferðatakmörkunum sem ákveðnar eru utan Íslands.
2. Upplýsingasöfnun um heilsufar einstaklinga án innlends lýðræðislegs aðhalds eða eftirlits.
3. Skyldubundnum bólusetningum, sóttkví eða öðrum aðgerðum sem óvíst er hvort Alþingi hefði samþykkt.
4. Heilsufarsrannsóknir á ferðafólki, rafræn heilsuvottorð, skráningu upplýsinga og aukin fjármálaleg aðkoma einkaaðila að starfsemi stofnunarinnar.

Við Íslendingar höfum áratugum saman lagt áherslu á mannréttindi, friðhelgi einkalífs og sjálfsákvörðunarrétt einstaklinga. Eigum við að leggja þessi verðmæti í hendur ólýðræðislegra embættismanna í Genf?

Aðrar þjóðir eru varfærnar – erum við það einnig?

Nokkur Evrópuríki hafa þegar vakið athygli á að breytingarnar gangi of langt og geti brotið gegn þeirra eigin stjórnarskrá. Sviss, sem hýsir höfuðstöðvar WHO, hefur kallað eftir skýrum fyrirvörum. Ísland má ekki sýna minni varfærni.

Hvað eiga Íslendingar að gera?

Við eigum að standa vörð um:

a) Fullveldi þjóðarinnar.

b) Rétt Alþingis til að ákveða aðgerðir á íslensku yfirráðasvæði.

c) Lýðræðislegt aðhald og gagnsæi.

Það þarf ekki að þýða að Ísland standi utan alþjóðlegrar samvinnu. En við verðum að tryggja að samvinna við WHO verði á okkar eigin forsendum og skilyrðislaust innan þeirra marka sem stjórnarskráin heimilar.

Niðurstaða: Höfum kjark til að segja NEI?

Ég skora á íslensk stjórnvöld að hafna þessum breytingum að óbreyttu. Þetta snýst ekki um að vera með eða á móti lýðheilsu – þetta snýst um það hver fær að taka ákvarðanir fyrir íslensku þjóðina.
Það er kominn tími til að við spyrjum okkur og lýðræðiskjörna fulltrúa okkar:
”Ef ekki við sjálf – hver á þá að verja fullveldi Íslands?”

Fresturinn er að renna út

Fresturinn til að senda höfnun rennur út 19. júlí 2025. Hafi slík yfirlýsing ekki borist WHO fyrir þann tíma, verða breytingarnar bindandi fyrir Ísland án frekari aðkomu löggjafans. Ljóst er að mikil leynd hvílir yfir málinu á Íslandi, á sama tíma og umræðan hefur farið vaxandi í ýmsum ríkjum sem telja fullveldi sitt í hættu vegna fyrirkomulagsins.

 

Áram Ísland!

#WHO #ESB #Bókun 35 #fullveldi Íslands #frelsi #EES-samningur #sjálfstæði #lýðræði #Ísland #stjórnarskrá #stjórnarskrárbrot "alþjóðlega heilbrigðisreglugerðin (IHR) #IHR #nýr heimsfaraldurssamningur #alþjóðaheilbrigðismálastofnunin #WHO 

Á að loka Heiðmörk fyrir umferð bifreiða í nafni vatnsverndar?

Orkuveita Reykjavíkur: "Verndum Reykjavík en dælum erlendri iðnaðarmengun niður í Hafnarfjörð, Þorlákshöfn, Helguvík og Húsavík með milljarðastyrkjum frá ESB í nafni "loftslagsmála"".

Til Skipulagsstofnunar.
Umsögn undirritaðs um Mál nr.690/2025: Heiðmörk - USK24030262

Gott neysluvatn er líklega ein verðmætasta auðlind Íslendinga. Vatnsból höfuðborgarsvæðisins eru aðallega staðsett í Heiðmörk og nágrenni og spannar vatnsverndarsvæðið um 250 ferkílómetra. Veitur hafa áhyggjur af vaxandi umferð um vatnsverndarsvæðið og sérstaklega sérstaklega vegna flutnings mikils magns olíu um Suðurlandsveg sem liggur við jaðar vatnsverndarsvæðisins.

Skv. skipulagslýsingu vegna nýs deiliskipulags Heiðmerkur frá maí 2025 er markmiðið að „draga úr umferð ökutækja á grannsvæði vatnsverndar”. Veitur vilja því takmarka bílaumferð um Heiðmörk verði takmörkuð og loka fyrir umferð almennra ökutækja.

Reykjavíkurborg vinnur ásamt Veitum að breyttu deiliskipulagi fyrir Heiðmörk. Stefnt er að því að vinna ljúki í upphafi næsta árs og er deiliskipulagið forsenda fyrir uppbyggingu nýrra bílastæða í nágrenni Heiðmerkur. Farartæki á vegum Skógræktarinnar og Veitna munu áfram hafa aðgang að friðlandinu. Almennri bílaumferð verður beint á ný bílastæði, en staðsetning þeirra liggur ekki enn fyrir.

Í Vatnaáætlun Íslands 2022-2027 segir m.a.: "Landsskipulagsstefna er fyrsta samræmda stefnan um skipulagsmál á landsvísu. Með henni eru settar fram leiðbeiningar til sveitarfélaga um skipulagsgerð og áætlanir um landnotkun og byggðaþróun. Í lögum um stjórn vatnamála kemur fram að opinberar áætlanir á vegum stjórnvalda t.d. vegna skipulagsmála skulu vera í samræmi við þá stefnumörkun um vatnsvernd sem fram kemur í vatnaáætlun. Við endurskoðun/breytingu skipulagsáætlunar skal samræma hana vatnaáætlun innan sex ára frá staðfestingu vatnaáætlunar.

Allt vatn á Íslandi skal vera í mjög góðu eða góðu ástandi og þurfa skipulagsáætlanir að taka mið af því."

Í 4. kafla koma fram eftirfarandi upplýsingar:

"Álag á vatn Þegar búið er að afmarka vatnshlotin þarf að greina álag á vatnsauðlindina en margs konar umsvif manna geta valdið álagi á yfirborðsvatn og grunnvatn. Vatnshlot geta verið undir álagi ef í þau eru losuð efni í því magni sem veldur mengun. Álag getur einnig skapast vegna vatnsformfræðilegra breytinga svo sem vegna breytinga á árfarvegum, stíflugerð, vegagerð, hafnargerð eða efnistöku. Jafnframt er vatnstaka umfram endurnýjun skilgreind sem álag. Álagi af völdum mengunar er skipt í tvennt, þ.e. punktlosun og dreifða losun. Punktlosun nefnist það þegar uppspretta losunar er afmörkuð t.d. frá útrásaropi fráveitu eða starfsleyfisskyldri starfsemi (iðnaði). Dreifð losun er hins vegar álag sem ekki er hægt að afmarka á ákveðnum stað og má þar nefna áburðarnotkun í landbúnaði, afrennsli af þéttum flötum, s.s. iðnaðarsvæðum og götum í þéttbýli." Ísland hefur nú hlotið 3,5 milljarða styrk frá ESB til að koma vatnsverndarmálum Íslands í betra horf.

Lokun grannsvæðis vatnsverndar í Heiðmörk myndi þýða að ekki væri lengur hægt að aka að Elliðavatni og að bílastæði yrðu staðsett við Suðurlandsveg, annaðhvort við Rauðhóla eða Búrfellsgjá.
Til að komast að Elliðavatni gætu veiðimenn þurft að ganga nokkra kílómetra og sem hefði þær afleiðingar að Heiðmörk yrði lokað fyrir þorra þeirra silungsveiðimanna sem Elliðavatn heimsækja.

Ferðafélag Íslands telur að hægt sé að ná markmiðum um vatnsvernd með mörgum leiðum án þess að skerða útivist og jafnvel Landsamtök hjólreiðamanna (LHM) telja að tillögur Orkuveitu Reykjavíkur um vatnsvernd í núverandi mynd gangi of langt gagnvart útivist á svæðinu.

Aðalfundur Landverndar hvetur alla sem koma að framtíðarskipulagi Heiðmerkur til að virða almannarétt og beita meðalhófi í ákvarðanatöku. Þannig má tryggja að nauðsynleg verndun vatnsbóla verði ekki á kostnað aðgengis almennings að náttúru og útivistarsvæðum. Leita skal allra leiða til að samræma markmið um vatnsvernd og rétt fólks til aðgangs að náttúru, í anda sjálfbærrar þróunar og lýðræðislegra sjónarmiða.

Enginn skynsamur maður getur verið á móti vatnsvernd en það vekur upp spurningu um hvort afstaða Veitna til verndar vatnsbóla Reykvíkinga sé í mótsögn við afstöðu eigandans í öðru máli þ.e. afstöðu Orkuveitu Reykjavíkur (OR), sérstaklega í ljósi áætlaðrar áhættufjárfestingar fyrirtækisins í umdeildu verkefni í Hafnarfirði; Coda Terminal, sem fólst í að dæla allt að 4,8 milljónum tonna af fljótandi iðnaðarmengun frá Evrópu niður í jarðlög og grunnvatn Hafnarfjarðar árlega. Allt í nafni "loftslagsmála".

Þetta er ekki mynd af alvöru CarbFFix drykk heldur AI myndlistarverk

Samkvæmt Umhverfisstofnun eru þetta aðskilin vatnasvið og þau hafa verið skilgreind sem slík í stjórn vatnamála á Íslandi þ.e. sem ótengd og sjálfstæð vatnshlot. Samkvæmt Veitum og Orkuveitu Reykjavíkur njóta Gvendarbrunnar sérstakrar verndar og Coda Terminal/CarbFix-svæðið staðsett utan vatnsverndarsvæða höfuðborgarsvæðisins.

Þrátt fyrir það voru sett fram rök og áhyggjur komu fram í umsögnum um Coda Terminal verkefnið í Hafnarfirði þar sem bent er á að ef öryggi bregst í dælingu eða holum geti mengun borist í grunnvatnsstrauma sem hugsanlega nái til jaðars Heiðmerkur sérstaklega ef þrýstikerfi grunnvatns raskast. Áhrifasvæði CarbFix í Hafnarfirði var áætlað vera um 100 ferkílómetrar, ekki má gleyma því. 

Hafnfirðingar höfnuðu tilboði OR og ESB um að dæla milljónum tonna af iðnaðarúrgangi niður í sitt nærsamfélag og nú er Orkuveita Reykjavíkur / CarbFix að leita að nýjum staðsetningum fyrir verkefnið utan höfuðborgarsvæðisins þar á meðal í Þorlákshöfn/Ölfusi, Helguvík og á Húsavík. Þar virðist ekki, frekar en í Hafnarfirði, vera litið til ákvæða Vatnaáætlunar Íslands 2022–2027.

 

Á sama tíma njóta íbúar Reykjavíkur og Hafnarfjarðar þess að ganga og hjóla um Heiðmörk með vatnsbrúsa fulla af hreinu vatni úr Gvendarbrunnum eða "sódavatni" frá CarbFix og sumir þeirra mæra jafnvel bíllausan lífsstíl. Mun Borgarlínan á endanum ná alla leið upp í Heiðmörk?

Reykjavík, 2. júlí 2025

Napólí – Tifandi tímasprengja í Campi Flegrei?

Um átta milljónir manna búa í borginni Napólí á Ítalíu og nærliggjandi byggðum. Borgin er vinsæll ferðamannastaður og í fyrra heimsóttu hana um fjórtán milljónir ferðamanna. Napólí er staðsett á vesturströnd Suður-Ítalíu, nánar tiltekið við flóann Golfo di Pozzuoli.

Campi Flegrei lítur ekki út eins og eldfjall, að minnsta kosti séð utan frá, en er engu að síður stærsta megineldstöð Ítalíu og getur gosið hvenær sem er. Eldfjallið Vesúvíus, sem lagði Pompeii í rúst árið 79 e.Kr., er lítið eitt í samanburði við þessa risaeldstöð sem talin er sú varasamasta á Ítalíu.

 

 

 

 

 

Undanfarið hafa mælst fjölmargir jarðskjálftar í Campi Flegrei og í næsta nágrenni Napólí, og landið risið um tugi sentímetra, sem bendir til þess að kvika eða gas safnist undir yfirborðinu.

Þó svo að jarðskjálftarnir séu flestir litlir (oft á bilinu 2–4 að stærð), eru þeir fjölmargir og stöðugir og þeim hefur fjölgað.

Þetta þýðir að jarðskorpan er stöðugt á hreyfingu og jarðvísindamenn fylgjast náið með því hvort skjálftarnir séu undanfari goss eða merki um kvikuhreyfingar.

 

 

 

 

 

 

Yfirvöld hafa hækkað viðvörunarstigið á svæðinu, en enn hefur ekki verið gefin út skipun um rýmingu borgarinnar eða hluta hennar sem er ekki áhlaupaverk. Neyðaráætlanir eru þó til staðar ef ástandið versnar. 

Ref.
https://www.volcanodiscovery.com/campi-flegrei-earthquakes.html

Jarðskjálftar á Tenerife. Ekki hætta á eldgosi.

Eyjan Tenerife er eitt stórt eldfjall. Að búa þar er í jarðfræðilegu tilliti svipað og að búa á Surtsey eða í Vestmannaeyjum. Eldfjallið Teide er það hæsta í Evrópu (3,715 m) en það gaus síðast árið 1909. Undanfarna daga hefur borið á óvenju mikilli jarðskjálftavirkni á eyjunni og um 100 jarðskjálftar hafa komið fram á jarðskjálftamælum á um 13 km dýpi á flestir á svæðum nærri Adeje, Vilaflor og La Cañadas, sem liggja nærri eldstöðvakerfi Teide. Stærsti skjálftinn mældist um 1.5 á Richter.

Engin hætta er talin vera á eldgosi 

Töluverð hræðsla hefur gripið um sig vegna skjálftanna en íbúar eru beðnir um að halda ró og fylgjast með opinberum tilkynningum – en ekki er talin hætta á ferðum að svo stöddu. Jarðvísindamenn telja að um kvikuinnskot í sprungukerfi djúpt undir yfirborðinu sé að ræða, sem er ekki óalgengt á þessu svæði.

Ekki er hætta á eldgosi þrátt fyrir nokkur frávik, sem komu fram snemma árs 2025, svo sem örlítið gasútstreymi og smávægileg aflögun á yfirborði jarðar. Þessi atriði hafa verið vandlega yfirfarin og metin og eru ekki talin benda til yfirvofandi hættu. Spænska jarðvísindastofnunin (IGN - Instituto Geográfico Nacional) leggur áherslu á mikilvægi þess að íbúar og ferðamenn leiti upplýsinga frá opinberum aðilum og og treysti á tæknilega túlkun sérfræðinga.

Ref.

https://involcan.org/
https://en.meteorologiaenred.com/Seismic-activity-in-the-Canary-Islands%3A-monitoring--progress--and-latest-news.html
https://www.volcanoesandearthquakes.com/map/Tenerife
https://www.direct-travel.co.uk/news/mass-panic-due-to-eruption-fears/
https://www.youtube.com/watch?v=vc0y6nMWIy8

Villuráfandi Viðreisn

Evrópuflokkurinn Viðreisn er eins máls flokkur. Hann var stofnaður árið 2014 af fýlupúkum í Sjálfstæðisflokknum með „háleit“ markmið í huga: Að koma Íslandi í Evrópusambandið, taka upp evru, selja rafmagn til útlanda og og tryggja að ákvörðunarvald Brussel hefði eitthvað að segja um hverjir mættu mjólka kýrnar á Húsavík. En framkvæmd markmiða flokksins hefur ekki gengið sem skyldi.

Viðreisn skilgreinir sig sem „frjálslyndan og alþjóðasinnaðan“ flokk – en óvíst er hvort hann líkist meira endurbættri Samfylkingu eða mýkri útgáfu Sjálfstæðisflokksins þ.e. eins og sá flokkur var áður. Flokkurinn er svo litlaus, miðjusækinn og gamaldags að hann hverfur algjörlega inn í pólitíska landslagið – eins og mosagróinn steinn á Þingvöllum.

Einungis eitt mál er á dagskrá flokksins en það er „að auka enn frekar þátttöku Íslands í Evrópusamstarfinu og gerast fullgildur aðili að Evrópusambandinu“.

Í alþingiskosningunum 2024 naut flokkurinn stuðnings 15,8% kjósenda, sem samsvarar þeim hluta kjósenda sem styður aðild Íslands að Evrópusambandinu..

Óvinsældir Viðreisnar

Það er ljóst að Viðreisn hefur ekki náð verulegri fótfestu sem stjórnmálaflokkur og að margir líta á hann sem misheppnaðan, að hluta eða í heild. Ein helsta ástæðan er að flokkurinn hefur átt í erfiðleikum með að afmarka sig skýrt frá öðrum miðjuflokkum, sérstaklega í samanburði við Sjálfstæðisflokkinn og Samfylkinguna.
Stefna Viðreisnar í Evrópumálum nýtur lítils stuðnings í íslensku samfélagi, þar sem andstaða við ESB-aðild hefur vaxið og reynst viðvarandi. Flokkurinn á því erfitt með að höfða til kjósenda sem leggja áherslu á þjóðernisleg gildi. Þótt Viðreisn skilgreini sig sem frjálslyndan stjórnmálaflokk, hefur flokkurinn stutt mál sem margir telja vera andstæð lýðræði og fullveldi Íslands, svo sem Bókun 35, þriðja orkupakkann og ýmsar reglugerðir sem tengjast Evrópusambandinu. Þetta hefur valdið tortryggni meðal kjósenda sem annars gætu hugsað sér að styðja frjálslyndan miðjuflokk.

Formenn og frambjóðendur flokksins hafa oft verið taldir skorta persónutöfra og sannfæringarkraft sem leiðtogar. Þeir hafa verið litlausir. Af þeim sökum hefur flokkurinn ekki náð að byggja upp sterka forystusveit, sem getur leitt stefnu hans með skýru afli og höfðað til víðtækari hóps kjósenda. Viðreisn hefur einnig átt samstarf við aðra stjórnmálaflokka í ríkisstjórn án þess þó að hafa skilað áberandi árangri. Þetta hefur, að mati margra, dregið úr sjálfstæði flokksins og gert hann að minni háttar fylgiflokki með takmörkuð áhrif í augum kjósenda.

Sumir gagnrýnendur líta á Viðreisn sem fulltrúa hagsmuna ákveðinna elíta, þar á meðal bankastéttar, fjölþjóðlegra fyrirtækja og embættismanna sem styðja nánara Evrópusamstarf. Þetta gerir tengsl flokksins við almenna kjósendur erfiðari og einkum við þá sem leggja áherslu á þjóðlegt sjálfstæði og lýðræðislega ákvarðanatöku.

Formaður Viðreisnar – lakur leiðtogi

Þorgerður Katrín gegndi lengi lykilhlutverki innan Sjálfstæðisflokksins og starfaði meðal annars sem aðstoðarmaður Davíðs Oddssonar. Síðar gekk hún í Viðreisn, stjórnmálaflokk sem skilgreinir sig sem „frjálslyndan og Evrópusinnaðan“. Þessi umskipti hafa valdið tortryggni meðal kjósenda sem líta á þau sem merki um pólitískan vingulshátt og hugmyndafræðilegan óstöðugleika.

Sem fyrrverandi ráðherra í ríkisstjórn Geirs H. Haarde fyrir efnahagshrunið hefur hún sætt gagnrýni fyrir tengsl við fjármálakerfið sem hrundi árið 2008. Þrátt fyrir flokkaskipti hefur sú tenging áfram verið til staðar í huga almennings. Margir líta á hana sem fulltrúa elítunnar fremur en fulltrúa kjósenda. Undir hennar forystu hefur fylgi Viðreisnar staðið í stað og flokkurinn ekki náð afgerandi árangri í kosningum. Flokkurinn hefur haldið áfram að vera smár stjórnmálaflokkur á miðjunni, án þess að hafa haft veruleg áhrif á mótun ríkisstjórnarstefnu.

Formaðurinn leitast nú við að auka fylgi flokksins með því sem hún kallar að uppfylla „alþjóðlegar skuldbindingar“. Þetta felur í sér fjárveitingar til ýmissa umdeildra verkefna svo sem vopnakaupa til Úkraínu, þátttöku Íslands í utanríkisstefnu ESB og hugsanlega þátttöku í sameiginlegri varnarsamvinnu Evrópu. Þar að auki fékk flokkurinn í arf mikil fjárútlát frá ríkisstjórn Katrínar Jakobsdóttur, sem Viðreisn styður, þ.m.t kolefnisskatta Evrópusambandsins og gífurlegan kostnað vegna málefna hælisleitenda. Formaðurinn vill fórna íslensku krónunni og taka upp evru án þess að vera komin í ESB, sem er algjörlega óraunhæft, jafnvel sem innantómt kosningaloforð.  

Þrátt fyrir kosningaloforð um að halda sköttum óbreyttum á kjörtímabilinu virðist skattbyrði almennings og fyrirtækja vera stöðugt á leiðinni til hækkunar. Það leynist engum, að innviðir Íslands glíma við verulegar áskoranir, svo sem menntakerfið, heilbrigðiskerfið, vegakerfið og félagslega kerfið, allt er þetta í algjörum ólestri. Margir öryrkjar og ellilífeyrisþegar búa við þröngan fjárhag, lepja dauðan úr skel á á sama tíma og Úkraína er sett á íslensk fjárlög og milljarðaframlög renna til NATO og ESB.   

Hvaða afleiðingar hefði innleiðing Bókunar 35 í íslensk lög?

Því miður er vanvirðing fyrir stjórnarskrá íslenska lýðveldisins og landslögum orðin lenska undanfarin ár meðal kjörinna fulltrúa á Alþingi. Þingmenn og ráðherrar hika nú ekki við að leggja fram og samþykkja lagafrumvörp sem bersýnilega sem stangast á við stjórnarskrána og jafnvel landslög. 

Frumvarp utanríkisráðherra og formanns Viðreisnar um Bókun 35 er gott dæmi um algjört virðingarleysi gagnvart stjórnarskránni og í raun íslensku þjóðinni. Í kjölfarið hefur hópur borgara lagt fram kæru á hendur utanríkisráðherra og formanni Viðreisnar fyrir meint landráð, sem er afar sjaldgæft í íslenskri stjórnmálasögu. Frumvarpið, sem hefur sætt töluverðri gagnrýni, er ekki talið bregðast við brýnum úrlausnarefnum. Það gengur hins vegnar gegn stjórnarskránni að gefa löggjöf sem samin er erlendis forgang umfram löggjöf sem samin er hérlendis. Frumvarpið eykur því á flækjustig og kostnað og eykur einnig á réttaróvissu.
 
Carl Baudenbacher, fyrrverandi dómari og forseti EFTA dómstólsins, sagði í  viðtali við Morgunblaðið þann 16. september 2024: „Meðan ég var í dómnum var ég þeirrar skoðunar að Island hefði ekki innleitt bókunina með réttum hætti og að því bæri að gera það. En það mætti líka segja að þetta ástand hafi varað svo lengi og án teljandi vandkvæða, að það væri ástæðulaust með öllu að hrófla við því. “

Helstu afleiðingar Bókunar 35:

Skerðir fullveldið: Alþingi missir sjálfstætt vald sitt til að hafna EES-reglum.
Brýtur gegn stjórnarskránni: Fer gegn 2. og 3. gr. um þrískiptingu valds og löggjafarvald Alþingis.
Skerðir lýðræðið: Almennir borgarar hafa ekki lengur áhrif á lagasetningu.
Aukið vald framkvæmdarvalds og erlendra stofnana: Reglur geta orðið bindandi án samþykkis Alþingis.
Hætta á fordæmi: Skapar grundvöll fyrir frekara framsal valds til ESB/EES.
Dregur úr réttaröryggi: Reglur verða óskýrari og valdaskipting óljósari.
Áhrif á dómskerfið: Dómarar og eftirlitsstofnanir fá aukin völd án lýðræðislegs umboðs (e. judicial legislation).
Áhrif á sjávarauðlindina:
Innleiðing Bókunar 35 myndi veikja forræði Íslands yfir sjávarauðlindunum. Almenningur á Íslandi hefur ítrekað lýst andstöðu við að afhenda Brussel vald yfir fiskveiðistefnu Íslands.

Framlagning frumvarps utanríkisráðherra um Bókun 35 hefur verið túlkuð af lögfróðum mönnum ekki einungis sem mögulegt brot á trúnaðarskyldum í opinberu starfi, heldur einnig brot á fullveldi ríkisins og grunngerð stjórnskipunar. Framlagning og stuðningur við frumvarpið hefur í því ljósi verið tengdur við ákvæði landráðakafla almennra hegningarlaga af gagnrýnendum.

Hvers vegna ættu menn ekki að kjósa Viðreisn?

Kjósendur sem leggja áherslu á lýðræði og fullveldi eru líklegir til að gagnrýna stjórnmálaflokka sem telja ekki að innganga Íslands í alþjóðleg bandalög feli í sér framsal fullveldis. Sjálfstæði Íslands var endurheimt eftir langa, sögulega þróun því það tók okkur Íslendinga 700 ár að öðlast aftur sjálfstæði og margir gagnrýnendur hafa lýst áhyggjum yfir því að slíkar stefnur ógni sjálfstæði ríkisins.

Viðreisn stefnir að því að fórna löggjafarvaldi Alþingis og Ísland undirgangist yfirþjóðlegt dómsvald Evrópska dómstólsins (ECJ). Stefna Viðreisnar hefur því verið gagnrýnd fyrir að fela í sér framsal á löggjafarvaldi Alþingis og að Ísland samþykki að hlíta dómsvaldi Evrópska dómstólsins (ECJ). Slíkt fyrirkomulag gæti haft áhrif á stjórnarskrárbundið löggjafarvald Alþingis á lykilsviðum svo sem á orkumál, sjávarútveg og aðra lykilþætti efnahagskerfisins.

Viðreisn studdi með ráði og dáð innleiðingu samkeppnisreglna og orkupakka ESB með tilheyrandi afleiðingum á raforkumarkaðinn hér á landi sem almenningur og eigendur smærri fyrirtækja, þar á meðal í gróðurhúsarekstri, hafa fundið fyrir vegna hækkunar raforkuverðs, sem enn er talið líklegt að aukist.

Viðreisn hefur ítrekað lýst efasemdum um þjóðaratkvæðagreiðslur í tengslum við mikilvæg mál og hefur stutt það að skuldbindingar Íslands gagnvart ESB/EES verði lögfestar án sérstakrar þjóðaratkvæðagreiðslu. Margir telja þetta ganga gegn meginhugmyndum lýðræðis og sjálfstæðis, þar sem ákvörðunarvald í málum sem snerta fullveldi er talið að ætti að vera í höndum almennings. Sagt hefur verið að Viðreisn hafi verið stofnuð til að fremja landráð. 
Í ræðu og riti hefur forysta Viðreisnar verið gagnrýnd fyrir að draga úr vægi íslensks fullveldis og vísa til þess sem „úreltrar“ hugsunar. Þetta hefur að mati gagnrýnenda rýrt traust til flokksins, sem samkvæmt hefðbundnum stjórnmálahugsunarhætti ætti að standa vörð um þá baráttu, sem leiddi til sjálfstæðis Íslands árið 1918 og stofnunar lýðveldis árið 1944.

Ályktun:

Ef þú lítur á stjórnarskrána sem grundvallarstoð ríkisvaldsins, að fullveldi Íslands sé órjúfanlegt og að lýðræði og þjóðarvilji eigi að vera ráðandi í ákvarðanatöku,  þá er ljóst að það samræmist ekki þeirri skoðun að rétt sé að styðja Viðreisn, flokk sem hefur með stefnum, aðgerðum og samstarfi leitast við að veikja grundvallarstoðir lýðveldisins.

Að lokum:

Þriðji orkupakki ESB eyðilagði Sjálfstæðisflokkinn.

Bókun 35 mun gera útaf við Sjálfstæðisflokkinn og Viðreisn.

Áfram Ísland!

 

 

#viðreisn #ESB #Bókun 35 #fullveldi Íslands #frelsi #EES-samningur #sjálfstæði #lýðræði #lýðveldi #Ísland #landráð #stjórnarskrá #stjórnarskrárbrot  

 

Hvað bíður Bessastaða?

Margir furða sig á þeim gífurlega áhuga sem ríkisstjórnin og aðrir ESB-flokkar sýna nú á því að þröngva frumvarpi utanríkisráðherra um Bókun 35 í gegn um Alþingi með ógnarhraða.
Skítt með það, þótt frumvarpið standist ekki stjórnarskrána.
Skítt með það, þó sterk rök liggi fyrir um að það feli í sér landráð samkvæmt hegningarlögum.
Skítt með allt og alla – einkum þá rugludalla í þjóðfélaginu sem þykjast vita eitthvað um málið og vilja stöðva það!

Þemis gengur aftur

(„Verst af öllu er að þessir atvinnukverúlantar – sjálfskipaðir fullveldissinnar, rasistar, Trumpistar og sviðsljósafíklar – skyldu hafa tekið eftir því þegar ÞKRG ætlaði fyrst að lauma frumvarpinu í gegn um þingið.“)

Skítt með allt!
Allt – nema hagsmunina.

„Það kemur ekki til greina að endurtaka martröðina með þriðja orkupakka ESB. Nú verðum við að koma fjórða orkupakkanum í gegn með hraði, og til þess þurfum við einfaldlega Bókun 35.“

Hagsmunir skipta máli – þó ekki hagsmunir þjóðarinnar.
Við erum ekki þjóðin.

 „Raforkumarkaðurinn og orkuauðlindin eru nú á sama óreiðustigi og fjármálamarkaðurinn var fyrir hrun bankanna og þar ríkir sama stjórnleysið“ – sagði fyrrverandi orkumálaráðherra nýverið á Alþingi.

Hvers vegna skyldi það vera svona?
Svarið er einfalt: Hagsmunir.
Hvers vegna ekki að setja heildarlöggjöf um vindmyllur?
Svarið er einfalt: Hagsmunir.
Hvers vegna ekki að setja lög um forgang raforku til heimila og smærri fyrirtækja?
Svarið er einfalt: Hagsmunir.
Hvers vegna er ekki arðsemisþak á framleiðslu raforku til heimilanna: 
Vill einhver giska á svarið? Nefndi einhver "Hagsmuni"?      

Hvernig getum við bútað upp Landsvirkjun og selt bitana einkaaðilum?
Hvernig getum við reist vindmyllugarða á hverjum rokrassi og smávirkjanir í hverri sprænu?

Skiptir Bókun 35 þar einhverju máli?
Já, hún skiptir öllu máli.

Hvað bíður nú Bessastaða?

 

 

#viðreisn #ESB #Bókun 35 #fullveldi Íslands #frelsi #EES-samningur #sjálfstæði #lýðræði #lýðveldi #Ísland #landráð #stjórnarskrá #stjórnarskrárbrot  

Gervigreindin - Sverð þitt og skjöldur?

Vörn borgarans gegn Græna gímaldinu við Álfabakka - Leiðbeiningar

Stjórnvöld víða um heim vara nú við áhrifum gervigreindar og það ekki af ástæðulausu. Hún getur verið afar öflugt tæki í höndum almennings til að berjast gegn ósanngirni, ofríki og valdníðslu stjórnvalda – ef hún er notuð rétt og gerð aðgengileg öllum. Hún getur skapað fólki rödd t.d. með samþættingu og greiningu á undirskriftalistum, samfélagsmiðlum og fréttum en einnig skrifað lagaleg og formleg mótmæli, kærur eða beiðnir. Einnig getur hún hjálpað fólki að beita réttum lagalegu úrræðunum á réttum tíma og sparað þannig bæði kostnað og tíma. 

Græna gímaldið fylgist vel með íbúum við Álfabakka

Hér verður gerð leikmannstilraun til að nýta gervigreind í þágu almennings við gerð kæru til Úrskurðarnefndar umhverfis- og auðlindamála.

Græna gímaldið við Álfabakka

Reykvíkingar búa nú við þann grimma veruleika að stjórnvöld valti yfir þá og taki lítið sem ekkert tillit til skoðana þeirra eða og vilja í mörgum mikilvægum málum. Borgarlínan, stöðugar umferðartafir og þrengingar, umferðarbrú án bíla, þétting byggðar, forljótar byggingar og bílastæðamál eru augljós mál þar sem vilji borgarbúa hefur verið virtur að vettugi.

Nærtækasta dæmið er Græna gímaldið við Álfabakka. Ljóst er að borgaryfirvöld hafi ekki virkjað nægilega íbúa svæðisins í ákvarðanatökuferlinu því mörgum þeirra var ekki kunnugt um framkvæmdina fyrr en hún var langt komin á veg (málið minnir að ýmsu leyti á Coda Terminal í Hafnarfirði), og lýstu þeir mikilli óánægju með skort á gagnsæi. Þetta brýtur í bága við meginreglur um lýðræðislegt samráðsskylduferli í skipulagslögum.

Skipulagsstofnun taldi hins vegar að ekki þyrfti að framkvæma umhverfismat, þrátt fyrir áhyggjur íbúa og umfang verkefnisins (kjötvinnsla í þéttbýlu íbúðahverfi). Þetta hefur verið gagnrýnt sem veikleiki í varúðarreglu náttúruverndarlaga og mat á neikvæðum áhrifum á nærumhverfi. Ekki liggur fyrir að borgaryfirvöld hafi lagt fram sjálfstæða matsskýrslu um áhrif framkvæmda á samfélagið. Áhersla virðist hafa verið lögð á formlegt samþykki framkvæmda, án efnislegrar greiningar á áhrifum þeirra. Heilbrigðiseftirlit Reykjavíkur hefur tekið undir þessar áhyggjur og telur að unnt hefði verið að koma í veg fyrir flest vandamál sem tengjast Græna gímaldinu.

Helstu mistök Reykjavíkurborgar má telja meðal annars:

1. Skortur á íbúasamráði og gagnsærri upplýsingagjöf.
2. Undanþága frá umhverfismati þrátt fyrir áhyggjur og rök íbúanna.
3. Óviðeigandi staðsetning iðnaðarstarfsemi í þéttbýli.
4. Ófullnægjandi gögn og óskýr forsenduvinna.
5. Vantraust hefur skapast vegna skorts á gagnsæi í ferlum  og breytinga á áður birtum fundargerðum.

Umhverfismat

Framkvæmdir við Álfabakka 2-4 í Reykjavík, þar sem fyrirhuguð er kjötvinnsla í svokölluðu „Græna gímaldi“, eru háðar umhverfismati samkvæmt lögum nr. 111/2021 um umhverfismat framkvæmda og áætlana. Samkvæmt 1. viðauka laganna getur pökkun og niðursuða á jurta- og dýraafurðum, þar sem gólfflötur bygginga er að minnsta kosti 1.000 m², verið háðar umhverfismati. Í þessu tilviki er gólfflötur kjötvinnslunnar áætlaður um 3.200 m², sem fellur innan þess ramma samkvæmt viðaukanum.

Byggingarfulltrúi Reykjavíkurborgar hefur viðurkennt að mistök hafi átt sér stað við útgáfu byggingarleyfisins, þar sem mat á umhverfisáhrifum var ekki framkvæmt áður en leyfið var veitt. Því var ákveðið að stöðva framkvæmdir við kjötvinnsluna á jarðhæð hússins meðan beðið var niðurstöðu Skipulagsstofnunar sem barst 8. maí 2025. Í niðurstöðunni kemur fram, að á grundvelli fyrirliggjandi gagna, sé fyrirhuguð framkvæmd ekki talin líkleg til að hafa í för með sér umtalsverð umhverfisáhrif, sbr. þau viðmið sem tilgreind eru í 2. viðauka laga um umhverfismat framkvæmda og áætlana. (Í viðauka 2 eru viðmiðanir við mat á framkvæmdum tilgreindum í flokki B. í 1. viðauka: a. eðli framkvæmda og b. staðsetning framkvæmda).  
Því skal framkvæmdin ekki háð mati á umhverfisáhrifum.

Þrátt fyrir niðurstöðu Skipulagsstofnunar hafa íbúar í nágrenninu lýst yfir áhyggjum sínum vegna mögulegra neikvæðra áhrifa, svo sem skuggavarps og hávaða, sem kjötvinnslan gæti haft á nærumhverfið. Skipulagsstofnun hafi við mat sitt því ekki tekið nægilegt tillit til
a) eðlis framkvæmdarinnar og
b) staðsetningar framkvæmdarinnar, eins og stofnuninni ber skv. lögum.
Heilbrigðiseftirlit Reykjavíkur hefur tekið undir þessar áhyggjur og telur að unnt sé að koma í veg fyrir flest þau vandamál sem tengjast Græna gímaldinu.

Kæra til Úrskurðarnefndar umhverfis- og auðlindamála vegna niðurstöðu Skipulagsstofnunar.

Samkvæmt 30. gr. laga um umhverfismat framkvæmda og áætlana má kæra ákvörðunina til Úrskurðarnefndar umhverfis- og auðlindamála. Kærufrestur er til 9. júní 2025.

Hvers vegna ætti ég að kæra?

Græna gímaldið snertir hagsmuni okkar allra. Þar er með alvarlegum hætti vegið að andlegri og líkamlegri líðan, sem og almennum lífsgæðum íbúa við Álfabakka. Græna gímaldið er dæmi um alvarleg skipulagsmistök að hálfu Reykjavíkurborgar og ætti að þjóna sem víti til varnaðar. Allir íbúar Reykjavíkur og í raun allir Íslendingar eru hagsmunaaðilar í þessu máli. Hér gefst tækifæri til að koma á framfæri ábendingum og krefjast úrbóta. Kæra þarf ekki að vera fullkomin. Aðal atriðið er að mótmæla úrskurðinum með einföldum rökum. Allir eru því hvattir til að senda inn kæru.
(sjá slóð á uppkast að kæru með Word sniði (.doc) hér að neðan) 

Hvernig á að kæra?

Hér eru stuttar leiðbeiningar um hvernig skuli kæra mál til Úrskurðarnefndar umhverfis- og auðlindamála:

Kæran skal vera skrifleg og má senda hana með því að skrá sig á Mínar síður á Island.is 
undir liðnum „Umsóknir“ sem er einfaldasta aðferðin.
Einnig er hægt að senda kæruna með tölvupósti á 
[e-mail] 
en þá þarf hún að vera undirrituð með eigin hendi. 

Hvernig lítur kæra út?

Hér að neðan er slóð á dæmi um hvernig kæra til Úrskurðarnefndar umhverfis- og auðlindamála gæti litið út. Skjalinu má breyta að vild og að smekk. Birt með þeim fyrirvara að undirritaður er ekki löglærður og hefur ekki sérfræðiþekkingu í lögfræði.

Hægt er að hlaða niður uppkasti að kæru sem .doc (Word) skjal hér

Nánari leiðbeiningar er að finna á þessari slóð:

Hvernig á að kæra? - Úrskurðarnefnd umhverfis- og auðlindamála

Við gerð þessa skjals er m.a. nýtt þjónusta gervigreindar, ChatGPT 

ref.
Lög um umhverfismat framkvæmda og áætlana 2021 nr. 111 25. júní

Skipulagsstofnun: Um umhverfismat framkvæmda 

Úrskurður Skipulagsstofnunar: Kjötvinnsla í húsnæði að Álfabakka 2a Ákvörðun um matsskyldu

ps

orðaskýringar: 

gervigreind (AI) = þeir að handan

Er starfsemi Climeworks á Íslandi hreint loftslagsklám?

Kjartan Kjartansson blaðamaður á Visir.is, einn ötulasti talsmaður ríku kolefniskrakkanna á Íslandi ritar nú lofgrein um starfsemi Climeworks á Hellisheiði, sem reist var fyrir milljarða til að bjarga jörðinni frá hamfarahlýnun og gera alla ríka í nafni "loftslagsmála" í leiðinni. Þar reynir hann af veikum mætti að varpa efasemdum á mjög svo ítarlega og um leið faglega gagnrýni Heimildarinnar á starfsemi Climeworks á Íslandi, starfsemi sem hefði sómt sér vel í vísindaskáldsögu frá 8. áratug síðustu aldar eða sem þema í glæpasögu eftir Kötu Jak. (þó án hreinskriftar Ragnars Jónassonar).

Loftlagsvél (kolefnissuga) í íslenskri sveit

Það hafa komið fram ýmsar sterkar gagnrýnisraddir og efasemdir bæði hérlendis og þá sérstaklega erlendis um starfsemi Climeworks á Íslandi og skemmst er að minnast áðurnefndar umfjöllunar Heimildarinnar þar sem fram komu ýmis vafasöm atriði þó ekki sé um að ræða beinar ásakanir um svindl. The Guardian fjallaði um Climeworks þ. 17. maí s.l. þar sem fram kemur, að að föngun væri langt undir öllum markmiðum og hafi þurft að segja upp um 10% af starsmönnum sínum.  

Hér eru helstu atriði sem hafa vakið athygli:

Mjög takmörkuð geta til kolefnisföngunar

Nýleg rannsókn sýndi að flaggskipið, Mammoth-verksmiðjan, sem opnaði árið 2024 með áætlaða árlega getu til að fanga 36.000 tonn af CO2 (á ári) hafði aðeins náð að fanga 750 tonn, þar af 105 tonn nettó, frá opnun sinni. Orca-verksmiðjan, sem hóf starfsemi árið 2021, hefur aldrei náð að fanga meira en 1.000 tonn á ári af þeim 3.000 tonnum sem lofað hafði verið. Climeworks er þó búið að selja 380 þúsund tonn af kolefniskvóta þótt þeir hafi ekki getað afhent nema rétt rúmlega 1 þúsund tonn. 

Hár rekstrarkostnaður og gífurleg orkunotkun

Tæknin sem Climeworks notar krefst mjög mikillar orku. Til dæmis þarf Orca-verksmiðjan um 8 milljónir kWh af varmaorku og 2,6 milljónir kWh af rafmagni árlega til að fanga 4.000 tonn af CO2. Til samanburðar nota öll heimilin í landinu samanlagt um 1,99 milljón kWh af raforku á ári.
Skv. grein K.K. á visir.is þurfa Climeworks-stöðvarnar á Íslandi um 4.300 kílóvött af varmaorku og um af 700 kílóvött raforku til þess að binda nettótonn af koltvísýringi úr andrúmslofti. Er það réttlætanlegt að íslensk heimili og t.d. garðyrkjubændur þurfi að keppa um raforkuverð við þessa ævintýrastarfssemi sem hefur ekki hefur hin minnstu áhrif á "loftslagið" eða hitastig jarðar?   

Gagnrýni á áhrif og áherslur

Sumir sérfræðingar vara við því að of mikil áhersla á kolefnisföngun geti dregið athyglina frá nauðsynlegum aðgerðum til að draga úr losun gróðurhúsalofttegunda. Þeir benda á að tæknin sé enn á frumstigi og geti orðið til þess að fyrirtæki fresti raunverulegum loftslagsaðgerðum.

Skortur á gagnsæi og gagnrýni á fjármögnun

Climeworks hefur safnað verulegum fjármunum frá stórfyrirtækjum eins og Microsoft, H&M Group, Morgan Stanley, TikTok og British Airways o.fl. Sumir gagnrýnendur telja að þetta geti verið dæmi um grænþvott, "greenwashing", þar sem fyrirtæki fjárfesta í slíkum lausnum til að bæta ímynd sína án þess að gera raunverulegar breytingar á starfsemi sinni.

Niðurstaða

Þó að Climeworks hafi ekki beinlínis verið staðið að svindli, þá eru til staðar efasemdir um og gagnrýni á áhrif og árangur starfsemi þeirra á Íslandi. Tæknin er enn í þróun og krefst mikillar orku og fjárfestinga, og því er mikilvægt að halda áfram að fylgjast með framvindu hennar og meta raunveruleg áhrif hennar á loftslagsmál. Mun hún bjarga heiminum frá hamfarahlýnun eða eru þetta hreinir draumórar glóbalistanna? Starfsemi Climeworks á Íslandi skuldar nú um fimm milljarða. Hver er tilbúinn að borga og til hvers? Kannski Orkuveita Reykjavíkur sem á CarbFix og sem virðist vera til í hvaða vitleysu sem er á kostnað skattborgaranna að sjálfsögðu. Svo er veðrinu á Íslandi kennt um ófarirnar (og Trump auðvitað). Þess má geta að Time Magazine útnefndi árið 2024 Climeworks eitt merkilegasta framlag mannkynsins til "loftslagsmála". Sama tímarit gaf reyndar kolefniskrökkunum í Running Tide sömu einkun fyrir að varpa trékurli með steinsteypuídýfu í hafið. Þessu trékurli er nú brennt í ofnum járnblendiverksmiðjunnar á Grundartanga.  

[1]: Grein Kjartans Kjartanssonar um Climeworks á visir.is
[2]: Upphafleg grein Heimildarinnar um Climeworks á Íslandi
[3]: Umfjöllun The Guardian
[4]: Grein í Geoengineeringmonitor.org um CarbFix og Climeworks
[5]: Grein um "kolefnissuguna" í Architecturaldigest.com
[6]: The World’s Biggest Carbon Removal Plant Just Turned 2. So, Uh, Is It Working?

Vítissótinn og páfi kaþólskra. Fær Umhverfisstofnun sömu sporslur og Hafró?

Vek athygli á afar áhugaverðri grein: Vítissótinn og páfi kaþólskra, sem Finnbogi Rögnvaldsson skrifaði nýlega í blaðið Skessuhorn. Þar segir hann m.a. um þær hugmyndir að varpa tugum tonna af vítissóda í Hvalfjörðinn til að "bjarga loftslaginu":

"Í efnafræði er notast við eininguna mól til að mæla efnismagn. Þegar eitt mól af NaOH (vítissóta eða natríumhydroxíð) er framleitt þarf til þess orku sem er u.þ.b. 330 kJ (ACS energy letters: Caustic Soda Production, Energy Efficiency, and Electrolyzers | ACS Energy Letters). Við bruna á 1 móli af C (kolefni) fæst orka sem er u.þ.b. 390 kJ, litlu meira en þarf til að framleiða vítissótann. Lengra þarf ekki að fara í rannsóknum á vítissóta og bindingu koldíoxíðs til þess að sjá að slíkt er einfaldlega ekki gerlegt. Ekki er hægt að binda koldíoxíð með vítissóta! Nettóútkoman verður aldrei í plús. Svo má vissulega halda áfram, rita efnaformúlur og gera grein fyrir umfangi viðfangsefnisins til þess að sjá þetta enn betur, hugmyndin er einfaldlega andvana fædd og ætti ekki að vera til umfjöllunar hjá virðulegum stofnunum ríkisins. Hvað þá að hljóta þar meðmæli. Þá er eitthvað skrítið á seyði." 

Umhverfisstofnun mælir með því að leyfi verði veitt fyrir tilraun með basa í botni Hvalfjarðar í sumar. Rannsóknin sé líkleg til að veita mikilvægar upplýsingar um möguleika á kolefnisbindingu án þess að hafa neikvæð áhrif á hafið.

Hér erum að ræða sömu kolefniskrakka og sem tókst að heilla þrjá ráðherra XD til að samþykkja og vegsama hryllingsgjörninginn "Running Tide", vitleysuna sem fékk þrátt fyrir allt nær 300 milljónir frá íslenska ríkinu í "skattaafslátt".

Nú hafa sömu krakkar "styrkt" Hafró um tæpar 100 milljónir og boðið starfsmann Hafró velkominn í "matsteymi" fyrirtækisins. Enginn skilur hvað er í gangi eða til hvers en spurningar hafa auðvitað vaknað hjá starfsmönnum Umhverfisstofnunar og þau spyrja kolefniskrakkana á fjölmenningarmáli:

"What´s in it for us?"

Hvet alla til að lesa grein Finnboga Rögnvaldssonar hér:

https://skessuhorn.is/adsendar-greinar/vitissotinn-og-pafi-katholskra

Umfjöllun um Running Tide í Heimildinni

Frétt RÚV um málið

Vörpum einhverju í sjóinn við Ísland til að bjarga loftslaginu.
Upplýsingar frá móðurfélagi Rastar sjávarrannsókna ehf.
Carbon to Sea Initiative á YouTube,