"Keep it simple" (B.B. King)

25.2.2009

Eitt eilífðar smáblóm

Íslandi verður allt til gæfu.
Hér býr dugmikil og heiðarleg þjóð. Allt frá blautu barnsbeini er okkur innrætt kappsemi og þor. Þeir sem skara fram úr, uppskeri ríkulegan ávöxt verka sinna. Með sanni má segja að hér búi heilbrigð þjóðarsál í hraustum þjóðarlíkama. Hörð lífsbarátta í óvægu umhverfi hefur hert okkur og mótað. Við erum hetjur. Rík sagnahefð hefur viðhaldið þeim baráttuanda og hugsjónum, sem drifið hafa okkur áfram og skipað okkur á verðskuldaðan heiðursstall meðal framsæknustu og hæfustu þjóða heims.

Það sem einkennir Íslendinga þó mest er samheldni og virðing. Virðing fyrir einstaklingnum, framtaki hans og skoðunum. Skólakerfið á ekki minnstan þátt í því að draga fram sérkenni, dug og hæfileika hvers einstaklings, sem fær því að njóta sín til fulls á öllum sviðum mannlífsins. Í skólakerfinu sem og í atvinnulífinu og ekki síst í stjórnkerfinu sem og í fjölmiðlum þrífst ekki ósanngirni, óréttlæti, hvað þá einelti. Heiðarleiki, orðheldni, staðfesta og trú á fagurt mannlíf heldur okkur saman. Hvert smáblóm í flóru mannlífsins fær að blómstra til fulls og á það fellur aldrei skuggi öfundar, ósanngirni eða græðgi. Hvert örsmátt frækorn nýtur hins frjósama jarðvegs til að vaxa og dafna með dyggum stuðningi umhverfisins. Þegar haustar að, falla gösin seinna og hægar en ella vegna þeirrar hlýju og þess stuðnings, sem þau hafa hvert af öðru.
Íslendingar bera virðingu fyrir þeim eldri og reyndari og hlúð er ríkulega að þeim sem skarað hafa fram úr og reynst þjóðinni vel. Í réttsýnu og þróuðu samfélagi þykir það sjálfsagt. Framtíð okkar er björt.
Íslandi verður allt til gæfu.