Hættum að úða garða með eitri! Verndum býflugurnar

Þegar býflugan deyr, þá deyja blómin.

Tími garðaúðunar dauðans er að hefjast. Eiturpésar ganga um með eiturkúta og gasgrímur. Eiturgufur þrengja sér inn um glugga og gættir. Krakkar og kettir kasta upp, fullorðnum verður bumbult.

Skordýraeitrið heitir "permetrín". Það er eitrað fyrir menn og spendýr en banvænt fyrir nær öll skordýr; fiðrildalifrur, blaðlýs, maura, köngulær, allar flugur jafnt bý- sem hunangsflugur. Permetrín drepur allt líf í garðinum. Það drepur fiska og það getur valdið ofnæmi hjá fólki. Það strádrepur ketti. Það brotnar þó fljótt niður en er mjög öflugt á meðan það er virkt.

Eitrið drepur öll skordýr, jafnt gagnleg sem "ógagnleg".
Garðaúðun raskar lífríki náttúrunnar.
Garðaúðun er hryðjuverk gegn lífríkinu.

Mikil vandamál hafa skapast víða t.d. á Bretlandseyjum. Þar er hunangsflugan horfin. Býflugur eru að hverfa í Bandaríkjunum. Þetta veldur því að blóm og jurtir að ýmsum toga frjóvgast ekki lengur. Lífríkinu hefur hnignað stórlega.

Til eru aðrar einfaldar leiðir til að halda skaðlegum skordýrum í skefjum en garðaúðun með banvænu eitri. T.d, með því að velja réttar tegundir gróðurs í garða. Tryggja nægilegt vatn og næringu. Úða bara með vatni á vorin þegar fiðrildalifrur kvikna.

Verndum lífríki náttúrunnar. Sláum skjaldborg um hunangsfluguna.

Heilbrigð humla að störfum

 

Áhugaverðir hlekkir:

Bumbebees in Crisis
The Honey Bee Crisis 
Um garðaúðun (Árni Davíðsson)
https://Xerces.org/pesticides/

Landakotsspítali - Landspítali - Sagan sem ekki má gleymast

Árið 1901 lá fyrir Alþingi Íslendinga frumvarp um byggingu Landspítala með 24 sjúkrarúmum. Þingmenn voru ekki á eitt sáttir um byggingu spítalans (gisp!). Þá buðust fátækar nunnur af reglu heilags Jósefs til að reisa og reka spítala í Reykjavík með ákveðnum skilyrðum. Ekki leist mönnun á þær hugmyndir (gisp!) og var Landspítalafrumvarpið sömuleiðis fellt. Nunnurnar lögðu þó ekki árar í bát og með söfnunarfé sem Jón Sveinsson (Nonni) safnaði í Frakklandi, Belgíu og víðar til byggingar St. Jósefsspítala í Reykjavík, viðbótarsöfnunarfé og láni erlendis frá var hafist handa við byggingu spítalans. Hornsteinn að nýrri spítalabyggingu á Landakotshæð var lagður í lok apríl 1902 og var spítalinn vígður 16. október sama ár. 

Íslenska ríkið sveik á sínum tíma þann samning, sem gerður hafði verið við nunnurnar í Landakoti fimm árum áður en samningur ríkisins við þær rann út og flæmdu þær úr landi þó svo Landakotsspítalinn hafi á sínum tíma verið eina sjúkrahúsið sem rekið var með hagnaði (gisp!) hér á landi og eina kennslusjúkrahús landsins í yfir þrjátíu ár.

Þar með hófst Der Untergang hins íslenska heilbrigðiskerfis en að öllum líkindum þarf einhvers konar karmasérfræðing til að leiðbeina íslenskum ráðamönnum um það hvernig hægt er að snúa þeirri slæmu þróun við. Það verður ekki gert með auknum fjáraustri í kerfið eingöngu. 

Keep it Simple!
BB King

St:Jósefsspítalinn Landakoti

Sundabraut, flóttaleið til betri byggða?

Hringbrautin er sprungin. Miklabrautin er sprungin. Ártúnsbrekkan er sprungin. Hvernig eigum við að komast út úr borginni ef vá ber að höndum svo sem eldgos eða önnur hætta? Hvernig er hægt að leysa umferðaröngþveitið í borginni?

Talsverð umræða hefur verið undanfarna daga um Sundabraut, sem hefur verið á aðalskipulagi Reykjavíkur allt frá árinu 1984. Borgaryfirvöld hafa dregið lappirnar varðandi varanlegar lausnir á umferðarmálum borgarinnar og bæta við fleiri umferðarljósum og hringtorgum. Hringbraut heitir sínu nafni af augljósum ástæðum, hún átti að vera hluti af hringbraut um borgina. Enginn heilvita maður getur verið á móti mislægum gatnamótum t.d. á Bústaðavegi og lagningu Sundabrautar og Skerjabrautar, sem myndu gjörbylta umferðinni í borginni. Nú ríkir algjör húsnæðis- og lóðaskortur í borginni. Þessar framkvæmdir myndu a.m.k. hleypa unga fólkinu, framtíðarútsvarsgreiðendurm landsins út úr borginni á skjótan hátt á leið þeirra út í nágrannasveitafélögin þar sem umferð er greiðari og þar sem ungt fólk hefur þó enn einhvern möguleika á að koma sér upp þaki yfir höfuðið. Í Reykjavík eru allir fastir í Ártúnsbrekkunni og búa enn hjá mömmu. 

Lambakjötsfjallið - Einföld lausn

Stjórnvöld áætla að eyða 100 milljónum í markaðssetningu á íslensku lambakjöti í útlöndum, svo ekki komi til verðlækkana á kjöti hér á landi. Íslenskir neytendur skulu borga fullt gjald fyrir lambalærið, hvað sem það kostar. 
Ef 100.000.000 krónurnar skila árangri þá á eftir að flytja kjötið til útlanda með ærum viðbótarkostnaði. Íslendingar eru jú bjánar upp til hópa, það vita menn.

En það er til einföld lausn á þessari vitleysu en það er "Lambakjötspassinn", sem einungis er ætlaður erlendum ferðamönnum hér á landi. Með passanum geta útlendingar keypt lambakjöt í verslunum og á veitingastöðum hér á landi á mun lægra verði en íslenskur almúgi. Þetta eykur ánægju ferðamanna, ferðamannastraumurinn til landsins eykst, kjötfjallið minnkar, gjaldeyrisforðinn stækkar, verslanir og veitingahúsin blómstra, gengið hækkar, skortur verður á lambakjöti sem hækkar verðið enn meira til landsmanna, ríkið sparar, ríkið græðir og allir verða aftur ánægðir, nema almenningur í landinu.  En það er aukaatriði.

Keep it simple!
BB King
 

Lambalæri og meðlæti

 

   

Kratakrísa í Evrópu

Samfylkingin er horfin. Hún hvarf fyrir horn þar sem hún bíður nú eftir því að íslenska þjóðin óski eftir því að taka upp evru og ganga í ESB. Eitthvað sem þjóðin hefur aldrei beðið um. Það er afar undarlegt að hér á landi eru enn til stjórnmálaflokkar sem byggja stefnu sína á því að ganga í ESB. Mönnum er það fyrir löngu orðið ljóst, að ESB veitir ENGAR varanlegar undanþágur. Það er tálsýn.
Jafnaðarstefnan á undir högg að sækja í Evrópu, einkum á Ítalíu eftir þjóðaratkvæðagreiðsluna og í Frakklandi, ef marka má skoðanakannanir. Jafnaðarmannaflokkurinn er að hverfa í Hollandi og í Póllandi komst flokkur krata ekki á þing. Eðalkratinn Martin Schulz er horfinn af Evrópuþinginu.   

Hægri stefnan virðist vera í mikilli uppleið í valdamestu ríkjum Evrópu, þ.e. í Þýskalandi, Frakklandi, Bretlandi, Ítalíu og á Spáni. Ef fram heldur sem horfir verða Svíar eina fjárhagslega vel stadda ríkið í Evrópu þar sem jafnaðarmenn ráða ríkjum.

Margir jafnaðarmenn í Evrópu eru óánægðir með þá þróun, sem orðið hefur í milliríkjaviðskiptum einkum í sambandi við TTIP og CETA og aðhaldsaðgerðir og niðurskurð ESB og raðir þeirra tvístrast bæði lengra til vinstri og jafnvel til hægri. Velgengni hægri flokka í Evrópu er mest þar sem menn sjá atvinnuleysi, flóttamannavandamál og alþjóðavæðingu sem sína helstu ógn. 

Á Íslandi eru menn í eðli sínu upp til hópa kristilegir demókratar. Jafnrétti, bræðralag og frelsi eru okkar boðorð, þó með áherslu á frelsið.

Martin Schulz

 

Nýr gjaldmiðill við Miðjarðarhafið?

Ítalir eru í bobba. Fylgismenn evrunnar lofuðu á sínum tíma hærri launum (þ.e. fleiri evrum) fyrir minni vinnu. Reyndin var allt önnur. Í dag eru kosningar á Ítalíu. Þar fer fram þjóðaratkvæðagreiðsla um afar mikilvægar stjórnarskrárbreytingar. Forsætisráðherrann Matteo Renzi, fyrrum borgarstjóri í Florenz var að mati margra bjartasta von þjóðarinnar þegar hann komst til valda fyrir um þremur árum síðan eftir fall Berlusconis. Renzi þykir nú höfða til Evrópusinna, ítölsku elítunnar í Toscana en síður til almúgans, sem nánast sveltur. Ítölsku bankarnir eru fallnir. Atvinnuleysi er nú um 12% og hefur ekki verið meira í ártugi. Renzi er orðinn tákn stöðnunar og afturhalds. Hann leggur nú fram róttækar stjórnarskrárbreytingar, sem myndu breyta störfum þingsins og auka völd ítölsku stjórnarinnar. Breytingarnar felast einkum í því, að draga úr áhrifum og sjálfstæði einstakra héraða í Ítalíu, og að minnka völd neðri deildar ítalska þingsins (Senato della Repubblica).

Andstæðingar Rensis hafa gagnrýnt þessar breytingar harðlega einkum talsmenn fimmstjörnuflokksins (Movimento 5 Stelle ) með hinn þrítuga Luigi Di Maio í fararbroddi gæti hugsanlega orðið næsti forsætisráðherra Ítalíu þar sem flokkur hans er orðinn jafn stór eða stærri en Lýðræðisflokkur Renzis. Hann telur ekkert vit í einum gjaldmiðli (evrunni) í Evrópu einkum löndunum í kring um Miðjarðarhafið. Hann vill að þingmenn sitji ekki lengur á þingi en tvö kjörtímabil og hann vill lækka laun þingmanna.  Hann vill setja reglur um lágmarkslaun, taka upp nýjan gjaldmiðil í stað evrunnar, endurskoða aðildina að ESB, draga úr útgjöldum til hernaðarmála, lækka skatta og draga úr völdum og áhrifum ítalska ríkisins og draga úr spillingu í stjórnkerfinu með nýrri lagasetningu.
Ef ítalska þjóðin segir "Nei", þá segir Renzi af sér og það mun væntanlega hafa mikil áhrif á ítölsk hlutabréf og banka, sem sitja uppi með ónýt lán og það mun aftur hafa áhrif til enn meiri lækkunar á gengi evrunnar. 
Núgildandi stjornarskrá, sem er frá 22 December 1947 er mjög mikilvæg í augum margra Ítala ekki síst til að viðhalda stöðugleika og hindra uppgang öfgaafla svo sem fasisma. 
Hvernig sem allt fer, þá verður afar spennandi að fylgjast með þróun mála á Ítalíu á næstu vikum og mánuðum. 

Viðbót kl 22:20
Útgönguspár benda til þess að ítalska þjóðin hafi sagt skýrt "Nei". 

Luigi Di Maio

ref.
The Guardian
The Independent
CNN
svd.se
Wikipedia

Íslenska krónan - góður kostur fyrir fjárfesta

Íslenski fjármálamarkaðurinn er orðinn einn áhugaverðasti valkosturinn í heiminum fyrir erlenda fjárfesta.  Fjárhagur íslenska ríkisins stendur nú með miklum blóma á mörgum veigamiklum sviðum. Íslenska krónan er orðinn traustur gjaldmiðill á nýjan leik. Menn treysta krónunni.   

Búast má við, sé miðað við úrslit Alþingiskosninganna þ. 29. oktober s.l. að íslensk stjórnvöld muni halda áfram á þeirri braut, sem þegar hefur verið mörkuð til enn meiri fjármálalegs stöðugleika og hagsældar.  

Íslenska krónan hefur gegnt afar mikilvægu hlutverki í þessu sambandi ekki síst í tengslum við vaxtamunaviðskipti og er því mikilvægt að aðhaldsaðgerðir stjórnvalda t.d. í banka- og gjaldeyrismálum skerði ekki þessa hagstæðu eiginleia íslensku krónunnar sem frjáls og óháðs gjaldmiðils.

ref.
http://seekingalpha.com/article/4018879-worlds-investable-currency

Sýrland - Aleppo brennur

Hvers vegna brennur Aleppo?
Stríðið í Sýrlandi hefur nú staði í um fimm ár. Það er erfitt að gera sér fyllilega grein fyrir því hvers vegna Rússar halda áfran að murka lífið úr íbúum Aleppo með aðstoð ríkisstjórnar Bashar al-Assads. Fyrir þessum atburðum eru þó margar ástæður, bæði stjórmálalegar og hernaðarlegar. 

Aleppo
Aleppo hefur í margar aldir verið stærsta borg Sýrlands og þriðja stærsta borg ríkis Ottómana. Þar búa rúmlega tvær milljónir manna og fyrir styrjöldina, sem nú geysar þar var hún mesta viðskiptaborg landsins. Saga borgarinnar nær aftur til 5000 f.Kr. og hafa mörg hverfi borgarinnar verið nær óbreytt frá 12. öld þ.e. frá þeim tíma, er Íslendingar hófu að rita Íslendingasögurnar. Íbúar borgarinnar eru flestir Súnnítar. Borgin hefur verið á valdi uppreisnarmanna í Sýrlandi og því yrði það bæði hernaðarlegur og um leið sálfræðilegur sigur fyrir stjórn Assads að ná borginni aftur á sitt vald. Hernaður Assads gengur út á það að einangra einstök svæði, sem eru á valdi uppreisnarmanna og einbeita sér að þeim fremur en að hefja allsherjarárás á þá.      

Rússar og Sýrlendingar hafa verið bandamenn frá 6. áratug síðustu aldar. Þetta samband styrktist á 8. áratugnum þegar faðir Bashar al-Assads, Hafez al-Assad komst til valda. Rússar vilja viðhalda þessu trausta sambandi þjóðanna. Vesturveldin steyptu Gaddafi af stóli í Lýbíu árið 2011 og Rússar vilja koma í veg fyrir að þeir atburðir endurtaki sig í Sýrlandi og hindra að Bandaríkjunum takist að koma stjórnum fleiri ríkja frá völdum. Þeir líta á þátttöku vesturveldanna í stríðinu eingöngu sem viðleitin þeirra til að koma stjórn landsins frá völdum fremur en hernaðaríhlutun af mannúðarástæðum.

Eina herstöð Rússa við Miðjarðarhafið er í Sýrlandi. Þar er bæði herflugvöllur og höfn fyrir herskip. Stefna Rússa er að hafa herstöðvar sem víðast í heiminum eins og í kalda stríðinu og var nýlegt hernaðarbrölt þeirra á Krímskaga liður í þeirri þróun.

Baráttan gegn hryðjuverkasamtökum. Pútín telur að ef stjórnarskipti yrðu í Sýrlandi myndi það leiða til útbreiðslu íslamskra hryðjuverkasamtaka. Þess ber þó að geta að með því að ganga til liðs við Assad þá ganga Rússar um leið til liðs við Íran og Hizbollah, sem stjórnað er af Sjíta-múslimum. Það getur aftur leitt til árása á þá frá hryðjuverasamtökum Súnníta, svo sem íslamska ríkinu. Það er því ekki bæði sleppt og haldið í þessu efni.

Hvar endar þetta? 

Þáttaka Rússa í stríðinu í Sýrlandi getur haft slæm áhrif á annars gott samband þeirra við önnur ríki í miðausturlöndum svo sem Ísrael, Egyptaland og Tryrkland. Þetta, ásamt háum útgjöldum til hernaðarins svo og fall rússneskra hermanna getur haft áhrif á ákvarðanir Rússa um áframhandandi stríðsrekstur í Sýrlandi. 

Pútín heldur þó áfram að kasta sprengjum á Aleppo, þrátt fyrir ályktanir Sameinuðu þjóðanna og getur Aleppo því auðveldlega þróast í nýtt Rwanda eða Srebrenica. 

Sheraton hótelið í Aleppo

ref.
Svenska Dagbladet
The Guardian
Al Jazeera
The Independent

Öflugur sólstormur skellur á jörðinni

Öflugur sólstormur skellur á jörðinni í dag (Geomagnetic storm >700 km/s, Class G1 and G2). Helst er talið að þetta geti haft áhrif á gervihnetti og háspenukerfi standi hann lengi svo og á ferðir farfugla. Einnig hafa norðurljósin verið óvenju öflug í gær og verða það áfram í kvöld og hefur Reykjavíkurborg ákveðið að slökkva á götuljósunum að þessu tilefni, sem fer vel.

Svo er bara að vona að sólin okkar breytist ekki strax í "hvítan dverg".

 

 

 

 

 

 

 

 

 

Sjá nánar hér:

Segulmælinar í Leirvogi

NASA

 

Spaceweather.com

Korka frá Miðhrauni er besti íslenski smalahundurinn 2016

Smalahundafélag Íslands stóð fyrir Landskeppni smalahunda dagana 27. og 28. ágúst að Bæ í Miðdölum. Dómari var Bevis Jordan, en hann er starfandi sauðfjárbóndi og reynslubolti þegar kemur að smalahundum og bauð hann upp á námskeið og leiðsögnfyrir dagana á undan, fyrir þá sem eru að temja fjárhunda á Snæfellsnesi.

Keppt í þremur flokkum:
– A-flokkur, opinn flokkur og fyrir þá hunda sem hafa fengið 50 stig eða meira í B-flokki.
– B-flokkur, fyrir hunda 3 ára og eldri sem ekki hafa náð 50 stigum í keppni.
– Unghundaflokkur, fyrir hunda yngri en 3 ára.

Keppnin í A flokki var gífurlega hörð, bæði smalar og fjárhundar sýndu glæsileg tilþrif þrátt fyrir sauðfé, sem hvorki var mjög hundvant né auðvelt í meðförum (les: ekki geðgott.) Aðeins munaði 1 -2 stigum á 1. og 2. sæti. Til svona keppni geti gengið upp þarf a.m.k. 60 - 70 kindur sem ekki er svo auðvelt að útvega á þessum árstíma.   

Úrslitin urðu eftirfarandi:

- A- flokkur: 
1. sæti: Korka frá Miðhrauni (5 ára). Smali: Svanur Guðmundsson

2. sæti: Frigg frá Kýrholti (3jaára). Smali: Aðalsteinn Aðalsteinsson

3. sæti: Karvel Taff frá UK (8 ára). Smali: Gunnar Guðmundsson

- B - flokkur:
Sigurvegari: Þristur frá Daðastöðum (4 ára). Smali: Brynjar Hildibrandsson
2. sæti: Kobbi frá Húsatóftum IIa (4 ára). Smali: Brynjar Hildibrandsson.
3. sæti: Tinna frá Stokkseyri (6 ára). Smali: Björn Viggó Björnsson.

Unghundaflokkur:

Sigurvegari: Píla frá Húsatóftum II (18. mánaða). Smali: Aðalsteinn Aðalsteinsson 

2. sæti: Elsa frá Hallgilsstöðum (19 mánaða). Smali: Maríus Snær Halldórsson.
3. sæti: Mist frá U.K. 32ja mánaða. Smali: Kristinn S. Hákonarson.  

Korka frá Miðhrauni

 

Sigurvegarar í A flokki

 

 Samvinna Korku og Svans vakti mikla athygli